Pigtugotan kan Department of Agriculture (DA) an pag-aangkat nin labi 8,000 metrikong tonelada nin saradit na frozen pelagic fish.
Ini tanganing matugonan an posibleng epekto kan mga nag-aging bagyo sa suplay kan mga lokal na sira sa nasyon asin sa tahaw kan closed-fishing season na nagpuon kan nakalihis na Nobyembre asin pinalawig pa hasta sa katahawan kan Marso 2025.
Napagpasiyahan man ini makalihis an nagin pag-meeting kan National Fisheries and Aquatic Resources Management Council.
Sa sarong statement, pigsaysay kan ahensiya na pig-aprubahan ni Agriculture Secretary Francisco Laurel Jr. an importasyon kan dugang na 8,280 MT nin frozen fish kabali an galunggong asin mackerel.
Itatagaman man ini para sa KADIWA kan Pangulo centers tanganing matawan nin abot kayang pagkukuahan nin protina an mga vulnerable sector siring kan indigent persons with disabilities asin senior citizens.
Ini an apwera pa sa 30,000 MT kan frozen fish na naenot na pig-aprubahan angkaton para sa huring kwarter kan 2024.
