Pigsierto ni Department of Agriculture Secretary Francisco Tiu Laurel Jr. na piglalaoman na sa masunod na semana an pag-release kan mga buffer stock kan bagas gikan sa National Food Authority (NFA).
Sigun ki Laurel, ongoing na an proseso kan releasing kan buffer stocks na pigkakalkulong mapakol sa 150,000 metric tons na iyong ipapabakal kan departamento sa mga local government units.
Paliwanag kaini, ongoing na an documentation kain sa tahaw kan NFA asin Food Terminal Inc (FTI) asin pakatapos na tulos na itatao kan FTI sa mga LGUs an mga magkakanigong dokumentos para sa piglalaoman na releasing kan mga bagas sa masunod na semana.
Sa datos ni Laurel, labing 50 na an mga local government units sa bilog na nasyon an nagpahiling nin interes na magbakal kan mga NFA rice kun dagusan na ining ma-release.
Sa Metro Manila, naenot na magpadara nin intent an San Juan City asin Navotas mantang sa parte man kan Visayas an mapuon ini sa Iloilo asin sa iba pang parte kan nasyon.
Mientrastanto, sigun ki NFA Administrator Larry Lacson, bastante pa soboot an pondo na igwa an NFA na nagkakantidad na P9 bilyong piso tanganing makabakal liwat nin bagas sa mga lokal na paraoma kun nag-alwan na an mga bodega kan saindang ahensiya.
Dugang pa ni Lacson, an magigin benta na makukua kan NFA gikan sa pagbakal kan FTI sa sainda kan mga nasambitan ng stocks an mapapasiring man soboot sa saindang pondo na pwedeng gamiton sa saindang mga operasyon.
Sa ngunyan nagtitinir sa bentahan na P35/kilo an mga NFA rice na iyong basado sa price mandate kan NFA na dugang na tubo na P2/kilo kaini.
