NAGA CITY – Nahilingan nin dakulang pagbaba an presyo sa presente kan kopras sa bilog na probinsya nin Camaries Sur. Sa paagi man kaini, dakula an nagin epekto sa mga mag ni-niyog.
Sa entrevista kan Bombo Radyo Naga ki John Villareal- Division Chief – Phil. Coconut Authority, sinaysay kaini na nagbaba nin labi sa 30 pesos an presyuhan na kun saen an dating 82 pesos na kilo nag pakol na sana ngunyan sa 50 pesos o 42-46 pesos.
Sigun ki Villeareal, makamundong realidad ini sa gabos na mga coconut farmers orog na ta kabaliktaran an nangyari sa dati nindang piglalaoman na pagbaba kan presyo ngunyan kuta bulan nin Agosto.
Saro sa mga nagin rason kan nagin presyuhan kan kopra sa Domestic Market, iyo an pag depende kaini sa Law of Supply and Demand na kun saen pag dakol an suplay, minababa an presyo kan sarong produkto.
Sa ibong na lado, huli ta nasa peak season man an pagharvest kan niyog sa bulan kan Agusto hasta Septyembre kaya man tuyong pina-uktaba kan saidnang opisina an Coconut Month Celebration. Sa bilog na kinaban, naglangkaw an produksyon kan niyog kaya pag abot sa export market, an posiyon kan coconut oil, hababa kaya man dae nakukua an qouta kaini sa ibang oil products.
Katakod man kaini napiritan an ibang negosyante na mag switch sa ibang oil products kaya nagresulta man sa pagbaba kan presyuhan kan kopra.
Mientrastanto, piglinaw kan opisyal na dae man nag papabaya an gobyerno asin igwa nin nakaalalay na mga paagi orog na an Phil Coconut Authority sa pag padagos na pagmonitor sa nagbubungkaras na huma sa industriya nin pag niniyog.
