NAGA CITY- Nagin marhay asin smooth an pagserbe kan Philippine Red Cross-Camarines Sur kan nakalihis na traslacion procession sa siyudad nin Naga.
Sa entrevista kan Bombo Radyo Naga ki Maria Felisa Badiola, Chapter Administrator kan Philippine Red Cross, Camarines Sur Chapter, sinaysay kaini na nagin smooth man an pag-mobilize, pagpreparar asin an deployment kan mga volunteers sa nasambitan ng aktibidad.
Sigun ki Badiola, taunan man na ginigibo kan saindang lado an pagseserbe sa Traslacion procession asin sa nagkapirang darakulang event sa Naga sa panahon kan Peñafrancia Fiesta kun kaya nagkakaigwa nin preprasyon asin pagbabago tanganing makaagapay.
Dugang pa kan opisyal, madali man na nakapagresponde an saindang mga personahe asin mga volunteers siringman kun ikukumparar soboot kan nakalihis na taon, mas dikit an nangaipuhan nin atensyong medikal.
Apwera digde, dikit man an saindang transfer na mga pasyente sa ambulansiya maski pa igwang dugang na ambulance an ipinadara kan National Headquarters.
Katakod digde, mapakol man sa labi 800 na indibidwal an saindang natawan nin asistensiya kun saen sa nasambitan ng numero halo-halo na puon sa mga minor hasta major cases puon September 1 hasta kan nakalihis na September 14.
Kabali sa mga namatean kan mga pasyente iyo an pagkawara nin malay; pagkahilo, nalulula asin iba pa.
Sa ngunyan, pigsierto na sana ni Badiola na preparado pa man giraray an saindang lado para naman sa papaabuton na Fluvial Procession sa maabot na Sabado, September 20, 2025.
