Pigrerespeto kan Palasyo Malacañang an independensiya kan Independent Commission for Infrastructure (ICI) kasunod kan pag-anunsiyo ni Baguio City Mayor Benjamin Magalong kan saiyang desisyon na magbutas komo special adviser kan komisyon na nag-iimbestigar sa anomaliya sa infrastructure projects sa tahaw kan agam-agam sa posibleng conflict of interest.
Sa sarong pahayag kasuodma, Setyembre 27, sinabi ni Presidential Communications Office (PCO) Acting Secretary Dave Gomez na nakapanghihinayang an pagbubutas kan alkalde, alagad an demand soboot kan mamamayang Pilipino an nananaig kaysa sa kisay man.
Saysay pa kan opisyal na an ICI na pigbibilog kan mga bistadong propesyunal na igwang dae matatawarang integridad, tulos na pinuonan an saindang trabaho sa enot na aldaw pa sana nin mayong pigsasayang na oras.
Enot na man na piglinaw ni Mayor Magalong na mayong conflict of interest sa saiyang trabaho komo sarong local official asin special adviser kan ICI.
Inihayag man kan alkalde na dae nagin madali an saiyang nagin desisyon, alagad nagtutubod an opisyal na ini an kaipuhan.
Sa ibong man kan pagbubutas kaini sa komisyon, dae soboot natitinag an saiyang commitment para sa katotohanan asin hustisya asin pigsierto sa publiko na ipagpapadagos kaini an laban kontra sa korapsiyon.
