NAGA CITY – Tinawan importansya kan pamayuhan kan Naga City Police Office an pigkondusir na simulation exercises para sa mga preparasyon na pigsasagibo ninda para sa papaabuton na Penafrancia Festival.
Sa nagin paghampang sa mga kagawad kan media ni PCol. Erwin Rebellon, City Director kan Naga City Police Office, sinaysay kaini na napaka importante kan simulation exercises na ini huli ta naantisiparan na an mga posibleng mangyari orog na sa kasagsagan kan prusisyon siring na sana kan stampede.
Sa siring na paagi napapraktis na kan mga imbweltong sektor kun ano an mga dapat nindang gibuhon sa siring na sitwasyon.
Dugang pa ni Rebellon, baku sana man mga tawo an saindang pigmomonitor asin pigbabantayan kundi magin an mga gagamiton na ekipahe. Nakikipagkoordinar naman soboot sinda sa mga barangay orog na sa mga lugar na aagihan kan prusisyon siring sa parte kan Penafrancia orog na ta digdi iaagi an haros kandaklan kan mga aktibidad, Sta. Cruz asin Balatas.
Sa ngunyan, naglalaom na sana an opisyal na mababawasan an street crimes siring kan pick pocket, ini nin huli ta igwa soboot nin mga historya na igwa nin nagdadayo sa syudad na mga paraikit orog na sa kasagsagan kan kasiributan sa Naga.
Saro man sa saindang tututukan an problema sa trapiko huli sa pagdakol kan mga nagluluwas laog na mga behikulo sa syudad nin Naga.
