Pigkaogma kan mga pamilya kan mga biktima kan war on drugs an pag-arestar ki dating Presidente Rodrigo Duterte ngunyan na aldaw nin Martes, Marso 11.
Ini an haros 7 taon magpuon kan pigsunad ninda an reklamo sa International Criminal Court (ICC) kan nakalihis na taong 2018 kontra ki ex-PRRD para sa soboot crimes against humanity huli man sa mga paggadan sa kampaniya kontra iligal na droga kan saiyang administration kaidto.
Sigun sa legal counsel kan pamilya kan drug war victims na si ICC Assistant to Counsel Atty. Kristina Conti, naglalaom ini asin an saiyang mga kliyente na mag abot an pagkakaarestar sa dating Presidente sa trial o paglilitis.
Dapat soboot na darahon si Duterte sa ICC sa The Hague, Netherlands. Alagad nakadepende pa soboot ini sa pirang mga factor siring man kan availability kan flights siringman an kasalbaduhan asin seguridad kan akusado.
Pahayag pa ni Atty. Conti na 8 taon an average period kan paglilitis sa ICC, depende sa kun gurano hahamunon kan kampo ni Duterte an mga kaso laban sa saiya.
Ginibo ni Atty. Conti an pahayag makalihis kumpirmaron kan Malacañang kan nakalihis na aldaw na nasa kustodiya na kan mga awtoridad an dating Presidente makalihis arestaron para sa crimes against humanity.
Kun saen sigun sa Presidential Communications Office (PCO), pigsirbi kan sarong prosecutor gikan sa ICC an arrest warrant kontra sa saiya pagkaabot kan dating Presidente sa Maynila gikan man sa Hong Kong.
Mientrastanto, sigun man ki Quad Committee lead chairman asin Surigao del Norte Rep. Robert Ace Barbers na magigin krusyal an mga masunod na semana sa pagtukoy kan promisa kan nasyon sa karapatang pantao, katarungan, asin paghahadi kan ley, na kun saen mahigot na pig susubaybayan kan pang kinaban na komunidad an mga pangyayari sa pag arestar ki Duterte asin man kalaunan an paglilitis sa saiyang mga soboot krimen kontra sa sangkatauhan sa atubangan kan ICC.
