Plano ng pamahalaan na magtatag ng sariling national oil stockpile upang mapalakas ang seguridad sa suplay ng langis ng bansa sa harap ng nagpapatuloy na krisis sa Middle East.
Ayon kay Energy Secretary Sharon Garin, mahalagang magkaroon ng nakalaang reserbang langis ang Pilipinas upang mabawasan ang epekto ng mga kaguluhan sa pandaigdigang merkado ng petrolyo at matiyak ang sapat na suplay sa panahon ng krisis.
Sinabi ng kalihim na bagama’t nananatiling sapat ang kasalukuyang imbentaryo ng langis ng bansa, kinakailangan pa ring maglatag ng pangmatagalang solusyon upang hindi gaanong maapektuhan ang ekonomiya at mga mamamayan sa tuwing may tensyon sa mga pangunahing bansang nagluluwas ng langis.
Nauna nang pinalakas ng pamahalaan ang fuel reserves sa pamamagitan ng pag-angkat ng karagdagang diesel at iba pang produktong petrolyo habang nagpapatuloy ang sigalot sa Middle East. Ayon sa Department of Energy, bahagi ito ng mga hakbang upang mapanatili ang matatag na suplay ng enerhiya sa bansa.
Matatandaang nagdeklara rin ang administrasyon ng mga hakbang upang tugunan ang epekto ng pagtaas ng presyo ng langis dulot ng krisis sa rehiyon, kabilang ang pagpapalawak ng fuel supply at paghahanap ng alternatibong mapagkukunan ng langis.
Sa kabila nito, tiniyak ng pamahalaan na patuloy nitong babantayan ang sitwasyon sa pandaigdigang merkado upang maprotektahan ang interes ng mga Pilipino laban sa posibleng kakulangan sa suplay at dagdag-presyo sa produktong petrolyo.
