(UPDATE) NAGA CITY- Ikinamundo kan manhamiento kan 9th Infantry Division, Philippine Army an pagkakadamay kan duwang sibilyan sa nangyaring engkwentro sa Sitio Tractora, Barangay Bagong Sirang, Sipocot, Camarines Sur.
Sa entrevista kan Bombo Radyo Naga ki Capt. Ronnie Madrinian, officer-in-charge kan Division of Public Affairs (DPAO), sinaysay kaini na ikinamundo ninda an impormasyon na garu nagagamit na human shield kan mga rebeldeng New People’s Army (NPA) an mga inosenteng sibilyan.
Dae man nalikayan kan opisyal na ma-anggot huli sa padagos na pangingikil kan mga rebelde sa mga nagtitios na namamanwaan.
Katakod kaini, pig-enkaminar man ni Madrinian an publiko na makipag-tabangan sa mga militar kun igwang mga NPA na nangingikil sa saindang lugar.
Mientrastanto, nagtitinir pa hasta sa ngonyan sa kostudiya kan PNP Sipocot an sarong pang pigtutubudang rebeldeng NPA na naarestar makalihis an nasambitang engkwentro.
Marurumduman na sarong pigtutubudang NPA an nagadan mantang duwang sibilyan an nairido sa nangyaring engkwentro sa nasambitang banwaan makalihis na makaresibe an mga militar nin impormasyon manungod sa pangingikil kan mga rebelde sa nasambitang lugar.
