NAGA CITY- Marhay para sa mga paraoma sa bilog na nasyon an pig-aapod na contract farming na pigbubusol kan National Irrigation Administration.
Sa entrevista kan Bombo Radyo Naga ki Cesar Adan, President kan Irrigators Association sa Libmanan, sinaysay kaini na sa paagi kan government’s contract farming program, an mga paraoma an episyenteng makaka-produce nin bagas na kun saen mapapababa kaini an average production cost sa nasa P15 per kilogram (kg), asin makakapagpabakal nin bagas sa nasa P29 kada kilo.
Sigun pa ki Adan sa paagi kan contract farming program, yaon an bilog na suporta kan gobierno na masimbagan an gabos na mga pangangaipuhan kan mga local farmers. Sa paagi kan contract farming, piglalaoman na makaka-produce nin dugang na tonelada kan paroy nin huli ta magkakaigwa nin adjustment sa dry season planting calendar na mapuon sa October, tanganing matawan man nin bastanteng panahon an mga paraoma na makapagtanom pa nin ibang pananom sa bulan kan Pebrero sa masunod na taon.
An resulta kaini, makakapag-produce nin tolong klase kan paroy sa parehas na area na igwang bastanteng patubig para sa mga pigtanom kan mga paraom na rekomendadong rice varieties na kumpleto man sa fertilizers asin package kan technology.
Dugang pa kan opisyal, an suporta kan NIA sa pag-ooma an igwang obheto na pamarhayon, palangkawon asin ma-sustain an quality rice production komo suporta sa programa kan gobierno na maabot an rice sufficiency sa paagi man kan provision sa irrigation waters.
Sa ngunyan, piglalaoman na sana ni Adan na magpapadagos-dagos an nasambitan ng programa tanganing mas orog pang mapamarhay an buhay kan mga paraoma sa nasyon.
