NAGA CITY- Pig-orgulyo ni Governor Lray Villafuerte an pinakainot na gameshow na Tubig to Handle na pigsagibo sa Probinsya nin Camarines Sur.
An nasambitan ng gameshow na madadalan sa telebisyon an pig direct mismo ni Eric Quizon, mantang kaibahan man digdi an mga bistadong personalidad na sina Marco Gumabao, Yassi Pressman, TJ Valderrama, Zia Mercado asin Danita Paner na nagsirbi komo host.
An gameshow an pigbalihan kan mga manlain-lain na mga grupo, maatubang an mga ini sa manlain-lain na mga challenges kun sain magkakaigwa man nin mga elimination round hasta sa igwang matadang team na pwedeng makapag-uli nin hasta sa P400,000.000 na papremyo.
Mientrastanto sigun pa sa opisyal obheto pa kan nasambitan ng gameshow an pag-promote sa probinsya kan Camarines Sur tanganing mas makapagtao pa nin mas magayon na oportunidad sa lado kan turismo, asin matawanan nin pagkakataon na makapagpuli nin mga papremyo an siisay man na nagmamawot magpartisipar sa nasambitan ng pakawat.
Sigun ki Governor Villafuerte nabilog an nasambitan ng gameshow sa pagtarabangan kan saindang mga pag-iriba tanganing makahaman nin konseptong world class gameshow na mahatod nin kaogmahan sa mga paradalan, asin tanganing ma highlight din an mga water base activities sa laog kan probinsya.
Dugang pa kan opisyal bako lang suboot gameshow an lalaoman na gigibuhon pa sa laog kan Camarines Sur, kabali naman digdi an mga pelikula kun sain pigpupurbaran kaining makiulay sa mga script writer tanganing makumbinsi na gibuhong shooting location an Probinsya tanganing mas maipahiling an gayon kaini asin urog pang matabangan na mapalago an turismo.
