NAGA CITY- Preparado na soboot an PNP-Bombon sa pagresponde ngunyan na panahon kan tag-uran.
Sa entrevista kan Bombo Radyo Naga ki PEMS. Diosdado Dumalasa, PCAD, PCNO, MESPO kan Bombom MPS, sinaysay kaini na nag-inspeksyon na soboot an saindang mga personahe sa mga rescue team asin mga equipments na kakaipuhanon tanganing masierto na preparado an saindang lado sa pagresponde sa panahon kan emerhensiya.
Sigun pa ki Dumalasa, igwang mga lugar sa saindang banwaan an pigbabaha o mga nasa low lying areas na dapat na i-monitor sa panahon kan tag-uran. An nasambitan ng lakdang an komo paglikay na magkaigwa nin casualties sa panahon kan kalamidad.
Dugang pa kan opisyal, mas marhay na an preprado tanganing malikayan an pagbuwis nin buhay kan iba. Mientrastanto, pigreport man ni Dumalasa na mayong nairehistro na mayor na insidente sa saindang lugar kan nakalihis na Mayo.
Sa ngunyan, pigpagirumduman na sana kan opisyal an publiko na pirmeng mag-utob sa mga panundunan na saindang piglatag tanganing dae mabugtak sa alanganin na sitwasyon.
