Kampante an pamayuhan kan Philippine National Police na dae na kaini kakaipuhanon na seselyuhan an mga service firearm kan saindang mga tauhan ngunyan holiday season.
Sigun sa PNP Public Information Office Chief, Police Brig. Gen. Randulf Tuaño, an bilog na organisasyon kan Philippine National Police iyo an mga propesyonal na mga alagad kan ley.
Sigun ki Tuaño, an nakatuodan kan pagbubugtak nin muzzle tape o tape sa puro kan badil sa service firearms kan mga pulis an dae na pigbali ni Acting PNP Chief, Police Lt. Gen. Jose Melencio Nartatez Jr. sa saiyang iniluwas na memorandum para sa kapaskuhan.
An desisyong ini an makalihis isinagibong Inter-Agency Meeting o pagpupulong sa pag ultanan kan manlaen-laen na ahensya kan gobyerno, kaiba na an Department of the Interior and Local Government (DILG) kan nakalihis na semana.
Pinag-ulayan sa meeting na ini an mga lakdang tangani masiguro an seguridad asin kasalbaduhan kan publiko sa panahon kan holiday season.
Marurumdumang kan nakalihis na taong 2023 pa huring ipinautob an mahigot na pagseselyo sa mga service firearm kan Pulisya.
Obheto kan lakdang na ini na malikayan an indiscriminate firing orog na sa tuyong masabat sa Bagong Taon, na kadalasan ay nagkakawsa nin peligro asin kapahamakan sa mga sibilyan.
Katakod man kaini, mahigot na inatasan ni Nartatez an gabos kan mga commander sa ground o mga lider sa manlaen laeng istasyon asin unit kan pulisya na kagyat asin tulos na resolbaron an gabos kan mga magigin kaso kan stray bullet o ligaw na bala sa laog sana kan 24-oras.
