NAGA CITY – Nagkondusir nin inspection kan mga motorboat an PNP Maritime group sa coastal area kan Barangay Balogo Pasacao, Camarines Sur.
Sa entrevista kan Bombo Radyo Naga ki Arnel Ama, Barangay Kagawad kan nasambitan ng lugar, sinaysay kaini na obheto soboot kan nasambitan ng inspeksyon an maaraman kung enkaso kumpleto an mga papeles kan mga parasisira na naglalawod sa kadagatan asin pagkumusta sa pagbuhay kan mga ini orog na ta inagihan an nasyon nin bagyo asin makusog na habagat.
Sigun pa sa opisyal, sa paagi kan aktibidad na ini naipapaabot kan mga residentes an saindang mga pinag-aagihan asin naaraman kan mga PNP Maritime group an nangyayari sa lugar.
Katakod digde, mayo man soboot nairehistro na kolorum na bangka asin an gabos an nagsusunod man sa mga guidelines na pigpababa kan saindang lokal na gobierno dapit sa tamang paglalawod.
Mientrastanto, liwat man na pinagirumduman kan opisyal an saindang mga parasisira na siertuhon na naka-ensured an saindang bangka tanganing igwang makuang tabang enkaso magkaigwa nin kalamidad asin iba pa.
Sa paagi soboot kaini, igwang ikapresentar na mga papeles o dokumentos asin mas mapaparekas an paghahagad nin asistensiya. Sa ngunyan, hagad na sana liwat ni Ama an kooperasyon kan saindang mga residentes tanganing mapamarhay an saindang lugar.
