Pigsierto kan Philippine National Police (PNP) na magigin salbado an pagboto kan mga mamamayang Pilipino sa aldaw kan eleksiyon sa maabot na Lunes.
Ini an pigpromesa ni PNP Chief PGen. Rommel Francisco Marbil sa publiko na iyo man sisiertuhon kan saindang kabuhan puon ngunyan na aldaw.
Sigun ki Marbil, mayong kaipuhan na ikahadit an publiko huli ta yaon soboot an saindang kabuhan na nakapreparar na magprotehir sa sainda pati na sa saindang mga boto sa aldaw kan eleksiyon.
Pagsierto man kan hepe, naka full-force deployment na an saindang mga personahes puon kasuodma tanganing masierto an kasalbaduhan asin kaayusan sa bilog na nasyon pirang aldaw antes an eleksiyon.
Basado man soboot sa nakalap nindang datos, puon sa saindang isinagibong survey, 19% na mga Pilipino an nagtutubod na dakula an magigin gampanin kan PNP para sa sarong matrayumpong eleksiyon ngunyan na taon.
Pagsierto man ni Marbil, salbado na makakaabot asin makakauli an mga botante antes asin makalihis sindang magboto asin sisisertuhon man na nasa salbado na mga kamot an pagigin sagrado kan saindang mga balota.
Mientrastanto, nagpuon na man ngunyan na aldaw an full force deployment kan PNP kun saen nasa 163,621 na mga kapulisan an pigpakuriyat sa bilog na nasyon para sa eleksiyon ngunyan na taon.
