Ipigheras kan Department of Trade and Industry (DTI) na an mga presyo asin suplay kan mga pundamental na barakalon sa rehiyon nagdadanay na estable, asin mayo nin dakulang epekto na naitala gikan sa nangingibabaw na kamugtakan kan ekonomiya, kabali an paglangkaw kan presyo kan mga produktong petrolyo.
Sa intrevista kan Bombo Radyo Naga ki Jay Percival Ablan (Provincial Director, Department of Trade and Industry – Camarines Sur), saiyang sinabi na mayo pa sindang nareresibeng pormal na reklamo hale sa mga konsumidores dapit sa paglangkaw kan presyo kan mga basic necessities asin prime commodities. Pigsierto man kan ahensya na mayo pang pig-file na kahagadan hale sa mga manufacturers para sa pag-adjust kan Suggested Retail Price (SRP).
Sa ibong kaini, piglinaw kan DTI na posibleng maiimplementar an price freeze enkaso magkaigwa nin deklarasyon nin state of calamity. An siring na deklarasyon pwedeng gibohon kan mga lokal na hepe ehekutibo arog kan alkalde o gobernador, o kan Presidente kan nasyon.
Pag-eksplikar ni Ablan, oras na madeklarar na an state of calamity, awtomatikong iimplementar an price freeze ngani na maibitaran an bakong rasonableng paglangkaw kan presyo kan mga basic commodities.
Sa isyu kan paglangkaw kan presyo kan gasolina, tinawan duon kan DTI na responsibilidad ini kan Department of Energy (DOE). Sa ibong kaini, padagos an pakikoordinar kan ahensya sa mga lokal na gobyerno para maseguro an magkakanigong monitoring sa mga presyo asin supply.
Katakod kaini, pig-enkaminar kan DTI an mga lokal na gobyerno na pakusugon an operasyon kan saindang Local Price Coordinating Council (LPCC), na pinamamayohan kan alkalde, tanganing mahigot na mabantayan an hiro kan presyo kan mga barakalon sa saindang nasasakupan.
Nagpatanid man an DTI kontra sa pagtipon o pagtago nin mga produkto nganing manipularon an presyo sa merkado. Segun sa ahensya, pagbalgar ini sa ley kun saen an multa nagpopoon sa ₱5,000 asin posibleng maglangkaw depende sa grabe kan pagbalgar asin sa kantidad kan mga imbweltong produkto. Pwede man ining magresulta sa pagkapreso.
Sa ngunyan, padagos an pagbabantay kan DTI sa sitwasyon kan merkado, lalo na sa maabot na semana santa, nganing masierto an proteksyon kan konsumidores asin price stability kan mga basic commodities.
