NAGA CITY – Kahagadan ngunyan kan pamayuhan kan sarong Naga City Youth Official na masolusyunan an naeeksperyensyahang kakulangan nin supply kan tubig sa nagkapirang parte kan syudad.
Sa nagin patara tara ni Naga City Youth Official Michaela Kyla Marfega, sinaysay kaini na basado sa nagigin pakikipag-ulay ninda sa pamayuhan kan Metro Naga Water District nabanggitan digdi an saro sa mga rason eyo an pagkaraot kan mga linya kan tubig huli sa mga pigkokondusir na road widening. Alagad, an pinadakula soboot na kawsa kaini an huli sa salang paggamit o pag-install nin mga electric booster water pump na direktang nakakabit sa mga linya kan MNWD.
Tinawan duon man ni Marfega na mayo man nin maraot sa paggamit kaini alagad nagigin sala sana ini enkaso iligal o bakung tama an pagkakaposisyon kaini na direktang nahigop sa tubig gikan sa mga linya kan tubig. Huli digdi an mga residencia na mayong booster pumps an enot na naaapektaran asin nawawaran nin supply kan tubig.
Piglinaw man soboot kan ahensya na pigpoporbaran ninda na simbagan an mga agrangay na pigpapaabot kan mga residentes alagad huli sa kadakulaan kan saindang nasasakupan dae ninda ini tolos na nasosolusyunan.
Huli digdi, hagad ninda ngunyan an tabang kan mga konsumedores magin kan lokal na gobierno sa pagsimbag sa naeeksperyensyahang water shortage orog na nagpuon na liwat an kralasehan.
