NAGA CITY- Umusad na an prusisyon kan imahen kan Itom na Nazareno sa ciudad nin Naga na inatendiran kan rinibong mga deboto.
Pasado alas-5 nin hapon subago kan magpuon an sarong banal na misa na pinangenotan ni Rev. Msgr. Noe P. Badiola, parish priest kan Saint John the Evangelist Parish antes dagos na nagpuon an prusisyon kan imahe na nag-ikot sa nagkapirang parte kan ciudad.
Kadaklan man sa mga deboto, amay pa sana nagpasiring na sa Holy Cross Parish para makisumaro sa nasambitang aktibidad asin kadaklan sa mga ini hale pa sa hararayong banwaan kan Camarines Sur.
Paramientras man na ipinasara an nagkapirang mga tinampo sa ciudad poon subagong alas-8 nin aga hasta alas-10 nin banggi.
Enot kaini, sinaysay ni Rev. Fr. Felix Abaño Jr., parish priest kan Holy Cross Parish sa barangay Tabuco, nilalaoman ninda na maabot sa labi sa 5,000 na mga deboto an nakisumaro sa saindang ika-29 kapistahan kan Itom na Nazareno ngonyan na taon.
Mientrastanto, sa entrevista kan Bombo Radyo Naga ki P/Supt. Eugenio Manondo, hepe kan Iriga City PNP, sinaysay kaini na naka-deploy na suboot an mga pulis sa palibot kan simbahan kan San Antonio de Padua asin sa mga aagihan kan prusisyon para masierto na salbado an mga deboto.
Padagos man an pagbulos kan mga deboto sa kapilyang kinamumugtakan kan replika kan imahe kan Itom na Nazareno sa banwaan man nin Calabanga kun saen nagpuon an debosyon sa Poon.
