NAGA CITY – Pigheras kan sarong pugo vendor an saiyang nagin eksperyensiya makalihis makapasar sa kakatapos pa sanang Certified Public Accountant Licensure Examination (CPALE) kan nakalihis na Mayo 2025.
Sa entrevista kan Bombo Radyo Naga ki Jediah Edsel Nery, Pugo Vendor asin Certified Public Accountant, sinaysay kaini na nagpuon ini sa pagbabakal nin itlog maalat puon grade 7 hasta sa nagin pugo vendor hasta sa maka-gradwar na sa kolehiyo.
Dugang pa kaini, kadalasan soboot na nagtitinda ini tuyong holiday, asin igwang mga aldaw na absent ini kan nasa junior high school tangani sanang makapagpabakal kan saindang produkto, siring man pag-abot kaini sa kolehiyo tuyong vacant man ninda ini nagbebenta nin sugok kan pugo.
Sigun pa ki Nery na an nakukua kaining benta sa pagtitinda an pigtatagama na para sa saiyang allowance nin huli ta sa ibang mga gastuson igwa man soboot kaparientes na nagsusuporta sa saiya siring na sana kan saiyang tugang.
Mientrastanto, pigheras pa kaini na an pagtitinda nin pugo an nagin kabuhayan ninda kun saen sa saiyang ama nagpuon ini, siring man ini man an nagin pantustos kan saindang pamilya tanganing mabuhay asin maka-graduate an saindang matuang tugang.
Sa ngunyan abiso na sana ni Nery orog na sa mga mawot man magkua nin kursong accountancy asin mawot magin Certified Public Accountant an isurat sana an mga kamawotan sa ‘table of your hearts’ asin dugangan nin pangadyi huli man ta ano man soboot an satuyang pangarap sa buhay dapat igwa nin effort, sakripisyo asin diyos sa pang-uroaldaw.
