NAGA CITY- Pigtawan-duon kan Department of Education (DepED)-Camarines Sur na bakong gabos na rason kan hababang level kan reading comprehension kan mga estudyante an kontrolado kan mga paratukdo.
Sa entrevista kan Bombo Radyo Naga ki Atty. Salvador Bogs Pelingon, Division Information Officer, DepEd- Camarines Sur, sinaysay kaini na nasa recovery period an mga paratukdo kun kaya saro man ini sa nahihiling pa na rason kun tano nagbaba an reading comprehension kan estudyante.
Alagad, pigtawan-duon kaini na an iba pang mga rason kan siring na isyu an dae na ninda kontrolado, halimbawa na digdi an mga aking mayong bastanteng pagkakan sa harong, mga aking nakakaeskperyensiya nin broken family, mga aking mas nae-enkaminar na maggamit asin magtagama nin oras sa internet asin bako sa pag-aadal.
Katakod kaini, piggigibo man soboot kan mga paratukdo an gabos tanganing magin marhay an performance kan mga aki sa klase.
Sa ngunyan, pig-enkaminar na sana ni Pelingon an lambang myembro kan pamilya orog na an mga magurang, na dapat makipagtabangan tanganing makapagklase an aki.
Dapat man soboot tukdoan kan mga ini an aki sa laog kan harong komo follow-up sa mga lessons sa eskwelahan.
