NAGA CITY- Pina-check na kan mismong kapitan kan barangay Mambulo Nuevo sa banwaan nin Libmanan, Camarines Sur an mga babaeng bados asin posibleng nangaki na sa saindang lugar.
Ini katakod kan nadukayan na umboy na lalaki sa compound kan St. Anthony de Padua Parish sa nasambitang lugar.
Sa ekslusibong entrevista kan Bombo Radyo Naga ki Jose San Buenaventura, kapitan kan Barangay Mambulo Nuevo, sinaysay kaini na pinapacheck na ninda an records sa saindang barangay sa kun siisay an mga bados sa saindang na yaon sa pag-ultanan nin pito hasta sa siyam na bulan na posibleng nangaki na.
Ini tangani na masusog na kun siisay an ina kan umboy na lalaki na winalat sa nasambitang simbahan kan nakaaging aldaw nin Domingo.
Segun pa ki San Buenaventura, mayong CCTV sa lugar kun sain winalat an umboy na nakapatos sa itom na tela asin nakabugtak pa sa plastik.
Mayo man suboot nin nakahiling sa kun siisay an persona na posibleng nagwalat kaini.
Katakod kaini, nakikipagtabangan na man an barangay council sa Libmanan-PNP tangani na magkundusir nin imbestigasyon sa pangyayari.
Nagtutubod man si San Buenaventura na posibleng sa simbahan winalat an umboy tangani na marikas ining mahiling asin matabangan alagad na-suffocate ini sa laog kan plastik.
Pangapodan man ni San Buenaventura sa publiko urog na sa mga magigin ina na mas magin responsable urog na kun magkakaigwa nin aki.
Nagpagirumdom man ini sa mga jovenes na dapat na mas magin prayoridad an pagklase tangani na makalikay sa teenage pregnancy.
