NAGA CITY- Pig-aktibo an response team kan Naga City Police Office, katakod kan pinaglaoman na epekto kan bagyong Nika sa siyudad nin Naga.
Sa nagin paghampang sa mga kagawad kan media ni PLtCol. Dario Sola, NCPO DCDA, sinaysay kaini na kan sarong aldaw, igwa sindang pigpautob na response team, kun saen, sa saindang pigkundusir na meeting kabali an PNP, Coast Gurd, MDDRMO para sa preparasyon kan nasambitan ng bagyo, siringman an nagbabadya pang raot nin panahon na malaog sa satuyang nasyon.
Apwera pa digdi, pig-aktibar man an support force katuwang an Local Government Units.
Mientrastanto, pinag-saysay man kan opisyal na nagkaigwa nin boluntaryong pag-ebakwar an mga ibang residente sa Barangay Santa Cruz huli ta nagtutubod si Sola, na na-trauma an mga residente sa nakaeksperyensiya na pagbaha kan manlamasa an bagyong Kristine sa Bicol region.
Katakod kaini, kamawotan man kan opisyal na gabos nin mga residente na yaon sa low-lying areas, prone sa landslide asin pagbaha an gibuhon an siring na boluntaryong pag-ebakwar tanganing malikayan an mga casualties.
