NAGA CITY – Napakarhay na an riles kun saen nagkabudalan an PNR Train asin oil tanker truck sa banwaan kan Nabua, Camarines Sur kasuudma, Marso 15, 2024.
Sa entrevista kan Bombo Radyo Naga ki PCPL Junard Bufete, PIO kan Nabua MPS, na bandang alas-3 nin mag-oomagahon, kan aksidenteng mabudalan kan Truck an nasambitan ng Tren.
Huli digdi, nagkaigwa man nin rerouting kasuudma kun saen an nagbyaheng tren na gikan sa siyudad nin Naga pasiring Legaspi an pig-reroute sa Iriga asin maluwas sa Bato, mantang an byaheng gikan sa Legaspi pasiring sa siyudad nin Naga an nag-agi sa Bato paluwas sa Iriga City asin malusot sa Nabua. Bandang alas-5 man nin pagkahapon sa kaparehong aldaw, napakarhay an riles.
An nasambitan ng insidente an premirong naikurit sa banwaan. Apwera pa digdi, mayo man nin nangyaring kasohan sa insidente, alagad nagsampo nin lugad an driver kan truck.
Mientrastanto, an nasambitan ng tren an pig-aapod na explorer o an nagki-clearing kan mga aagihan kan pampasaherong tren.
Sa ibong na lado, nagpapadagos an check point operation kan saindang lado partikulamente na ta konektado pa ini sa COMELEC Check point.
Sa ngunyan, pagirumdom na sana kan opisyal sa gabos nin motorista asin drivers na enkaso nagbabyahe nin alaganin na oras, asin nakakamate nin pagal o tungka, maggilid na sana asin maghingalo muna tanganing makalikay sa mga aksidente.
Siringman, an pagsunod sa mga rules anf regulation sa check point tanganing magin marhay an saindang pagbyahe.
