Mayo mang isyu sa Sandiganbayan enkasong mag-atendir si Senador Jinggoy Estrada saiyang mga pagdangog sa paagi kan videoconferencing.
Iyan an ipigheras ni Sandiganbayan Second Division presiding judge Geraldine Faith Econg kan ulayan an hiling nin kampo kan senador manungod sa nasambitang lakdang. Pig-esplikar ni Econg na ipigkokondusir naman an court proceedings sa online set-up na aprubado man kan Korte Suprema asin mga nagkapirang korte sa bilog na nasyon.
Alagad pigtawan-doon niya na dai na kapot kan anti-graft court an kun ano man na magiging kasuguan kan Senado manungod sa set-up na itatao o susundon kan lehislador enkasong magkaigwa ini nin suway na direktiba.
Katakod ini kan nagin apela kan kampo ni Estrada na tugutan siya kan husgado na mag-atendir sa paagi kan online videoconferencing sa paglaom na kasabay kaining magibo an saiyang mandato na mag-atendir asin magpartisipar sa mga caucus, sesyon, asin committee hearings kan halangkaw na katiripunan, kun sain kaipuhan an saiyang presensya.
Mayo pa man na pormal o opisyal na kasimbagan an korte sa kahilingan kan senador. Alagad enkasong tugutan, dai na kaiphan pa ni estradang mag-atendir nin personal sa mismong korte na ipigdesignar sa saiyang pagdangog enkaso na nakatalaan ining gibuhon sa pisikal na pasilidad nin Sandiganbayan.
Presenteng nakadetine si Estrada nin huli sa kasong plunder na ipigsangat kan Office of the Ombudsman asin sa epekto kan arrest warrant hali sa nasambitang korte nin huli sa pagkaka-imbwelto sa flood control anomalies.
