Pigsierto ni Special Assistant to the President (SAP) Anton Lagdameo Jr. an matibay na suporta asin pagtutok kan pambansang gobyerno sa normalization process asin status kan katoninogan sa probinsiya kan Bangsamoro Autonomous Region in Muslim Mindanao (BARMM).
Ini an makalihis na mag-atendir si Lagdameo komo Guest of Honor and Speaker sa awarding kan educational assistance para sa mga decommissioned combatants kan Moro Islamic Liberation Front (MILF) na ginanap sa Cotabato City kan nakalihis na Miyerkules, Agosto 6.
Sigun ki SAP Lagdameo, an edukasyon an saro sa mga prayoridad kan presenteng administrasyon sa irarom kan pamamayo ni Presidente Ferdinand Marcos Jr. na kun saen pigtawan-importansiya kan Presidente an libreng edukasyon asin dugang na tabang pinansiyal para sa mga Pilipinong estudyante.
An nasambitan ng programa an parte kan normalization program sa irarom kan Comprehensive Agreement on the Bangsamoro (CAB) na igwang obhetong tabangan an mga MILF decommissioned combatants na makapagpuon nin bagong buhay asin makapag-eskwela an saindang mga aki kun saen an nagkapira sa mga benepisyaryo an mga aki kan decommissioned combatants na presenteng nasa kolehiyo.
Sinaysay ni Lagdameo na padagos an gobyerno sa pagsierto na an mga presenteng peace process an epektibo, inklusibo, asin magsimbag sa tunay na kamugtakan kan mga komunidad na nagsasairarom sa haloy na problema asin tunay na naapektaran.
Mientrastanto, nagpasalamat man si Lagdameo sa Office of the Presidential Adviser on Peace, Reconciliation and Unity (OPAPRU), Inter-Cabinet Cluster Mechanism on Normalization (ICCMN), asin mga katuwang na ahensiya kan gobyerno pati na sa mga civil society organization para sa saindang tabang sa pagpapauton kan normalization program.
Sa pagtatapos kan programa, pig-enkaminar kaini an mga student-grantees na gamiton an oportunidad na ini bako sana para sa personal nindang mga trayumpo kundi para na man sa saindang kaniya-kaniyang komunidad.
Saro sa mga inisyatiba kan Office of the Special Assistant to the President (OSAP) iyo an peace caravan na pigpapatotoohang bilog an obheto kan gobyerno para sa katoninongan, kauswaagan asin pagtindog kan BARMM.
