NAGA CITY – Nangapudan an sarong barangay kagawad sa Pasacao, Camarines Sur sa mga benepisyaro kan program kan gobierno na gibuhon an saindang responsibilidad.
Sa entrevista kan Bombo Radyo Naga ki Arnel Ama, Kagawad kan Brgy. Balogo, sa nasambitan ng banwaan, sinaysay kaini na an ugali ngunyan kan tawo dae na soboot maintindihan.
Kun saen, enkaso igwa nin naaraman na mga programang pigtatao kan gobierno, mawot man kan mga ini na matawan maski pa dae man sinda kwalipikado.
Alagad enkaso man nakabali na sa programa siringkan TUPAD, an iba dae man nagagampanan an saindang responsibilidad komo mga benipisyaryo.
Sigun ki Ama, nagkapirang benipisyaryo kaya sa saindang barangay an nagpaabot nin agrangay na an iba dae napapagal sa paglinig o dae nagtatrabaho, nin haros duwang oras sana.
Huli digdi, nahihiling ni Ama na baka dae na sinda matawan kan PESO Office nin slot para sa nasambitan ng programa huli sa kariribukan na nangyayari.
Mientrastanto, kamawotan man kan opisyal na matawan nin pagkakataon an iba pang pamilya sa nasambitan ng programa. Nangapodan man ini sa mga benipisyaryo na dae manamantala asin magin patas.
