NAGA CITY – Tinawan duon kan sarong konsehal sa syudad nin Naga na dae man dapat maapektaran kan nangyayaring kariribukan sa West Philippine Sea an sisterhood na igwa an Naga asin China.
Sa nagin paghampang sa mga kagawad kan media ni Naga City Councilor Joe Perez, sinaysay kaini na an dae man dapat na maapektaran kan mga nasambitan ng isyu an mga proyekto asin programa na nabilog sa pag-ultanan kan duwang lugar huli ta naggikan ini sa “goodwill.”
Dae man soboot dapat na iimbwelto pa an mga bibilogon pa sanang programa sa futuro hasta dae pa nagbababa an tensyon sa pinag-aagawang teritoryo ini tanganing dae man makaapektar sa mga posibleng pagbyahe pasiring sa China o pagpasiring naman kan mga taga duman digdi sa Naga.
Dugang pa ni Perez mas makakamarhay na dae na malahidan nin political issues an nasambitan ng mga proyekto tanganing mas magin marhay an dalagan kaini.
Sigun pa sa konsehal, dae gayong magpapartisipar an Naga sa mga siring na conflict sa pag-ultanan kan satuyang nasyon asin China.
Sa ibong na lado, padagos man na piggigibo kan Sangguniang Panglungsod nin Naga an saindang responsibilidad tanganing maipaluwas an katotohanan sa mga isyu na pigbabatas sa nagkapirang opisina kan Naga City Hall.
Obheto man soboot kan saindang lado na masimbagan an gabos na mga isyu na ini asin matawan nin linaw tanganing malikayan an mas malalang isyu na pupwede pang magbungkaras.
Katakod kaini, pigpopokusan man ninda an maabot na bagong imbestigasyon dapit sa nasambitan ng mga isyu na kinakahampang ngunyan kan nagkapirang indibdiwal sa saindang mga opisina.
