Pigpapakomento kan Korte Suprema si Ombudsman Jesus Crispin Remulla asin Independent Commission for Infrastructure (ICI) sa petisyong pigsunad ni dating Ako Bicol Party-list Representative Zaldy Co na nagkukuwestiyo sa issuance kan probable cause sa saiyang kasong graft asin malversation katakod sa flood control scam.
Sa sarog statement, sinaysay kan korte na inaksyunan kan en banc sa sesyon kaini kan nakalihis na Pebrero 11 an petisyon ni Co kontra sa Ombudsman asin ICI asin pigtawan an mga ini nin 10 aldaw puon kan maresebir an notice sa petition for certiorari ni Co kaibahan an saiyang kahagadan para sa pag-isyu nin temporary resttraining order.
Alagad mayong inisyung TRO an Korte Suprema.
Paliwanag kan hukuman na an kasuguan an bakong boot sabihon na inako na, inaprubahan o pigtawan nin paborableng desisyon kan korte an petisyon ni Co kasunod kan kasuarin sanang ruling kaini sa Vallacar Transit vs Yanzon, na nagtatalaan nin guidelines para sa pigdeklarar na pugante na pinagbawalang matawan nin judicial relief.
Ngunyan na bulan sana, pigdeklarar na kan Sandiganbayan si Co komo sarong pugante, na pinagtutubodang nasa luwas kan nasyon puon pa kan nakalihis na taon.
Alagad pigrason ni Co sa saiyang petisyon na an Vallacar vs Yanson an sarong exception asin nagtitinir na “controlling rule” an Miranda vs Tuliao, kun saen dae kaipuhan an pisikal na pag-kustodiya sa akusado tanganing maghagad nin affirmative relief.
