Pigsierto ni Senador Sherwin Gatchalian an saiyang bilog na suporta sa pagtagama nin pondo sa irarom kan 2026 General Appropriations Act (GAA), partikular na para sa Alternative Learning System (ALS) asin sa mga estudyante na igwang kakundian.
Sa paagi kan 2026 national budget, sarong dakulang kantidad na P4.917 bilyon an itatagama para sa Flexible Learning Options, na obhetong magtao nin manlaen-laen na paagi kan pag-aadal para sa mga nangangaipuhan.
Gikan sa ponding ini, P897 milyon an particular na nakatagama para sa Alternative Learning System (ALS),sarong programa na obhetong maabot an mga dae nakapagklase sa pormal na sistema kan edukasyon.
Dugangpa digde, P400 milyon man an nakatagama para sa Alternative Delivery Mode (ADM), na nagtatao nin mga alternatibong paagi kan pagtutukdo tanganing masimbagan an manlaen-laen na pangangaipuhan kan mga estudyante.
Kaibahan man an P3.62 bilyon na pigtagama para sa mga learning resources na gagamiton sa ALS asin ADM. Kaibahan digde an mga libro, kagamitan, asin iba pang materyales na makakatabang sa mga estudyante na makanood asin mag-uswag.
Apwera pa digde, P56 milyon an kukuonon gikan sa Basic Education Facilities para sa pagpapatindog kan ALS Community Learning Centers (CLCs).
Nakatagama man an P1.04 bilyon para sa Special Needs Education Program, na obhetong suportaran an edukasyon kan mga estudyante na igwang kapansanan.
Gikan sa ponding ini, P209 milyon an itatagama para sa pagpapatindog kan Inclusive Learning Resource Centers (ILRCs) o an conversion kan mga Special Education (SPED) Centers tanganing magin ILRCs.
Pigtawan-duon ni Senador Gatchalian an paninindugan kan 2026 budget sa inclusive education, na boot sabihon mayong sisay man na ALS learner o estudyante na igwang kakundian an mawawalat sa pag-abot kan saindang mga pangarap sa paagi kan edukasyon.
