Hiniling ni Senate Ethics and Privileges Committee Chairperson JV Ejercito kay Senator Ronald “Bato” dela Rosa na magbigay ng komento kaugnay sa panukalang amyendahan ang Senate rules upang ipatupad ang “no work, no pay” policy para sa mga absent na senador.
Ayon kay Ejercito, tinalakay ng Senate of the Philippines Committee on Ethics and Privileges ang mga reklamo laban sa ilang miyembro ng Senado, kabilang ang usapin ng matagal na pagliban sa sesyon.
Sinabi niya na bahagi ng panukala ang pag-amyenda sa rules ng Senado upang tugunan ang absenteeism, at hiniling ng komite ang opinyon ni Dela Rosa bago ito dalhin sa plenaryo.
“As I’ve mentioned before, ‘yan ‘yung dilemma ko noon… we have to have the plenary,” ani Ejercito, at idinagdag na kinakailangang aprubahan ng buong Senado ang anumang pagbabago sa rules.
Ang isyu ay umusbong matapos na hindi makadalo si Dela Rosa sa mga sesyon mula Nobyembre 2025, kasunod ng mga ulat na may kaugnayan umano siya sa imbestigasyon ng International Criminal Court kaugnay ng war on drugs.
May nakabinbing ethics complaint laban sa kanya dahil sa matagal na pagliban, habang umaasa si Ejercito na boluntaryong isasantabi ng senador ang kanyang suweldo at allowances habang wala sa trabaho.
“Siguro just to be fair… no work, no pay,” dagdag pa ni Ejercito, sabay diin na dapat pantay na ipatupad ang prinsipyo sa lahat ng manggagawa, kabilang ang mga halal na opisyal.
