Gigibuhon nang semanahan an simulation exercise kan direktiba ni Philippine National Police (PNP) Chief PGen. Nicolas Torre III na 5 minute response time kan mga pulis para sa gabos na hepatura kan Pulisya.
Iyan an nagin bagong kasuguan ni Torre makalihis na sibakon sa pwesto an walong Chief of Police sa National Capital Region (NCR) makalihis na mabigong makasimbag sa saiyang nasambitan ng direktiba.
Sigun ki Torre, an saiyang mga nagin direktiba an malinaw asin simple huli ta haloy na soboot ining nagigibo sa Quezon City orog na sa irarom kan saiyang liderato komo Commander kan Quezon City Police District (QCPD).
Obheto man kan direktibang ini na mas rekasan pa an pagresponse kan saindang kabuhan tanganing masierto na malalaoman an saindang kapulisan sa oras kan mga pangangaipuhan.
Mientrastanto, nagpatanid man si Torre sa mga commanders na dae makakasimbag sa saiyang kasuguan.
An mga mabibigong makasimbag soboot asin magsunod sa nasambitan ng direktiba an tulos na masisibak sa saindang pwesto asin posibleng makasuhan huli sa failure to comply to the directives of the Chief PNP.
Pira sa mga regional directors an nanganganib na masibak sa saindang mga pwesto huli sa dae pagsunod sa kasuguan na ini kan hepe.
Paliwanag ni Torre, an saiyang kasuguan an sarong mahigot na direktiba gikan ki Presidente Ferdinand Marcos Jr. kaya man kaipuhan tulos na maaksyunan para sa mas marekas na pagresolbar kan kriminalidad sa nasyon.
Piglalaoman man na ini an masirbi soboot na warning sa iba pang mga regional directors asin commanders na sunudon an 5 minute response time huli man ta kadakol na mga pulis an nakalinyada tanganing magribay sa sainda sa oras na dae ninda magampanan nin marhay an saindang tungkulon.
