Kumpirmadong gadan an gabos na siyam na personahe na nakasakay sa sarong pribadong jet na nagbagsak haros siyam na milya an rayo hale sa Mar-a-Lago estate ni US President Donald Trump sa Palm Beach County, Florida.
Segun sa Federal Aviation Administration (FAA), an eroplano, na sarong Learjet 60, nagbagsak sa sarong residential area harani sa Cresthaven kan 12:50 nin hapon kan Domingo, Nobyembre 1.
Hale an nasabing eroplano sa Austin-Bergstrom International Airport sa Texas asin pasiring kuta sa North Eleuthera Airport sa Bahamas kan mangyari an makuring aksidente.
Nakuha sa sarong dashcam video an marikas na pagbagsak kan eroplano bago ini tuluyang bumunggo sa daga asin tulos na suminabog sa sarong dakulang fireball.
Iniladawan ni US Transportation Secretary Sean Duffy an pangyayari bilang sarong “horrific tragedy” mantang nagpadara na nin team an FAA tanganing suportahan an imbestigasyon kan NTSB.
Sa presente, mayo pa nin iniluluwas na pagkakakilanlan sa mga nagadan mantang padagos man na inaaram kan mga awtoridad kun igwa nin mga residente sa daga na nalugadan o naapektaran sa insidente.
