NAGA CITY- Pigtawan-duon kan sarong principal sa banwaan kan Goa, Camarines Sur an importansya kan suporta para sa mga estudyante gikan sa saindang mga magurang asin eskwelahan.
Sa entrevista kan Bombo Radyo Naga ki Oscar Parola, Principal kan Goa Central School, sinaysay kaini na an DepEd igwa nin programa para sa Math Fair na pigkukundusir taun-taon.
Kun saen, nagkakaigwa nin training para sa mga aki tanganing maipresenter sa higher level competition asin magin sa International event.
Apwera pa digdi, nagkakaigwa man nin mga coaches an mga aki asin magin an mga magurang nagkukua soboot nin private teachers tanganing magtukdo sa saindang mga aki dapit sa math.
Pigtawan linaw man ni Parola na an subject na math an bako sanang dapit sa computation, alagad kaipohan man nin comprehensive learning.
Huli digdi, nakikisabayan an saindang mga estudyante na nanggagana nin mga medalya sa mga international competition pag-abot sa International Mathematical Olympiad elementary level.
Mientrastanto, an mga nanggana sa siring na kompetisyon an tatawan nin pag-onra asin awarding sa maabot na Disyembre 27 na ikukundusir sa CWC Pili, Camarines Sur para sa mga gold medalist na mga estudyante siring man sa mga coaches.
Sa ibong na lado, namamayagpag man an iba pa nindang mga estudyante pag-abot sa iba pang mga subjects na kun saen kasuarin sana, nakaguno man an mga ini nin mga medalya sa Division event.
Pigtawan-duon man kan principal na dakulang katabangan an bilog na suporta kan magurang asin kan eskwelahan sa mga aki tanganing makaputan kan mga ini an saindang trayumpo.
