Kinumpirmar kan Philippine Coast Guard (PCG) an presensiya kan duwang barkong pandigma kan Estados Unidos sa rayong 30 nautical miles gikan sa Panatag (Scarborough) Shoal.
An USS Higgins (DDG-76), sarong guided-missile destroyer, asin man an USS Cincinnati (LCS-20), sarong littoral combat ship, an namonitor sa lugar pirang aldaw makalihis an banggaan kan duwang barko kan China sa kadagatang sakop kan Pilipinas.
Sigun ki Commodore Jay Tarriela, tagapagtaram kan PCG para sa West Philippine Sea, an presensiya kan mga barko kan US an nagyari kasunod kan insidente kan nakalihis na Agosto 11 kun saen an China Coast Guard (CCG) vessel na may hull number 3104 an bumangga sa sarong barkong pandigma kan People’s Liberation Army Navy (PLAN) mantang hinahabol an barkong PCG na BRP Suluan.
Sa report kan PCG, nagsagibo nin peligruso na maniobra an CCG vessel na nagin rason kan banggaan. Malala an nagin danyos enutan kan barkong Tsino, mantang nakaiwas man an BRP Suluan sa insidente.
Napagraman na an Panatag Shoal, bistado man komo Bajo de Masinloc, an sarong bahura na manunutaran sa laog kan 200-nautical mile Exclusive Economic Zone (EEZ) kan Pilipinas. Bagaman haloy nang parte kan tradisyunal na pagsisira kan mga Pilipino, ini an inaangkin man kan China asin padagos na binabantayan kan saindang coast guard asin man navy.
Kan nakalihis na taong 2012, nagpuon an tensyon sa lugar kan magkaigwa nin standoff sa pag-ultanan kan Pilipinas asin China, na napuli sa de facto control kan China sa bahura.
An pag abot kan mga barkong pandigma kan US an parte kan mas mahewas na estratehiya kan Washington tangani ipahiling an suporta sa mga kaalyado kaini sa Indo-Pacific, kabali an Pilipinas. Sa irarom kan Mutual Defense Treaty ng 1951, may obligasyon an Estados Unidos na magsimbag sa mga armadong pag-atake laban sa mga barkong pampubliko kan Pilipinas sa Pacific.
Bagaman dae direktang nakikiaram an US sa mga territorial dispute, an saindang presensiya an pigkokonsiderar na mensahe nin pagmamantinir sa kalayaan sa paglalayag asin man paggalang sa international law.
Padagos na naninindugan an Pilipinas sa karapatang pangkadagatan kaini, basado pa sa 2016 arbitral ruling na pumabor sa nasyon asin man nagpawarang-bisa sa mahewas na nine-dash line claim kan China.
Sa ibong kan mga insidente kan pangha-harass sa mga parasirang Pilipino, nagtitinir na aktibo an PCG sa pagtataong-proteksyon asin man pagmomonitor sa mga aktibidad sa West Philippine Sea.
