Personal na itinao ni Presidente Ferdinand Marcos Jr. an P100 million na tabang pinansyal ki General Santos City Mayor Lorelie Pacquiao sa pagbisita kan Presidente sa Mindanao ngonian na aldaw.
An nasabing pondo gagamiton sa renovation kan General Santos City Hall.
Segun ki Presidente Marcos, hale sa Local Government Support Fund an pondo.
Pig-anunsyo man kan Presidente na makakaresibe man nin P50,000 na ayuda an gabos na pamilya kan mga nagadan.
Base sa pinakahuring record kan National Disaster Risk Reduction and Management Council, maabot na sa 45 indibidwal an naibareta na nagadan huli kan linog.
Si Presidente Marcos matao man nin tabang pinansyal sa lokal na gobyerno kan Sarangani asin South Cotabato para sa paghirahay kan mga naraot na imprastraktura.
Alagad, dae man pigdetalye kan Presidente an kantidad. Kukuahon suboot an pondo sa LGSF.
Sinabi ni Presidente Marcos na an Sarangani an pinakamasakit na lugar sa Mindanao.
Mientrastanto, pigsugo ni Presidente Ferdinand Marcos Jr. an mga nanunungdan na ahensya kan gobyerno na padalion an paghatod nin ayuda asin paghirahay kan imprastraktura para sa mga biktima kan makusog na linog.
Nagpasiring an Presidente ngonian na aldaw sa Gensan para personal na ma-assess an sitwasyon asin magdistribwer nin ayuda.
Pigsierto man kan Presidente na nakatutok man an National Housing Authority (NHA) sa pagtabang sa mga paratukdo asin iba pang residente na nakaeksperyensya nin danyos sa saindang harong.
Apwera sa inisyal na relief goods, pagkakan, asin medical services, inasegurar man kan gobyerno an asistensya pinansyal para sa mga trabahador na apektado kan temporaryong pagsara kan mga establisimiento sa irarom kan sistemang no work, no pay.
An nasabing ayuda itatao sa paagi kan Assistance to Individuals in Crisis Situations (AICS) program kan Department of Social Welfare and Development (DSWD) asin Tulong Panghanapbuhay sa Ating Disadvantaged/Displaced Workers (TUPAD) kan Department of Labor and Employment (DOLE).
Kasabay kaini, pigboot kan Presidente an marikas na pag-assess kan mga naraot na edificio para madeterminaran kun pano ini marikas na maibalik sa normal na operasyon. Pinaparikas man kan mga awtoridad an pagbukas kan mga baradong tinampo tanganing mas marikas an pag-agi kan mga relief vehicles, siring man an pagbalik kan kuryente asin suplay nin tubig sa mga apektadong komunidad.
Naglalaom an Presidente na mapundo na an mga aftershocks ngani na maipadagos an clearing and recovery operations kan gobyerno.
