Inaprubahan na kan Senado sa ikaduwang pagbasa an Senate Bill No. 2426 o an Comprehensive School Safety Act ngunyan na aldaw, Setyembre 15, na an katuyuhan iyo an magtogdok nin sarong nasyunal na sistema tanganing mapakusog an seguridad asin proteksyon kan mga estudyante asin school personnel.
Sa irarom kan panukala, gigibuhon an sarong National Comprehensive School Safety Framework na nakasentro sa tulong pangenot na lakdang: an prevention, response, asin recovery.
Kaiba digdi an pagmidbid sa mga posibleng peligro sa eskwelahan, pagpasanay sa mga paratukdo, magurang, asin student leaders, pagkakaigwa nin malinaw na emergency protocols, communication systems, asin regular na safety drills.
Nakalaag man digdi an pagtao nin psychosocial support asin trauma-informed care sa mga estudyante, paratukdo, asin personnel na maapektaran kan mga insidente nin karahasan o iba pang emergency.
Kaiba man sa panukala an mga lakdang tanganing pakusugon an physical security kan mga eskwelahan, arog kan CCTV cameras, metal detectors, asin security screening, depende sa Risk assessment asin pangangaipo kan lambang eskwelahan.
Itinutulod ni Senador Bam Aquino an panukala matapos an sunod-sunod na insidente nin karahasan sa mga eskwelahan, kaiba an pambabadil sa Tacloban City na ikinagadan kan tulong estudyante.
Suportado man ini ni Department of Education Secretary Sonny Angara, na nagsabing makakatabang an panukala tanganing magin permanente asin may supisyenteng pondo an mga programa kan DepEd para sa campus security, anti-bullying, asin mental health.
