Inihayag ng Anti-Money Laundering Council (AMLC) na umabot sa ₱6.7 bilyon ang mga covered at suspicious bank transactions na nakatala sa pangalan ni Vice President Sara Duterte at ng kanyang asawang si Atty. Manases Carpio, ayon sa ulat na isinumite sa impeachment hearing sa Kamara.
Sa pagdinig ng House committee on justice nitong Miyerkules, inilahad ni AMLC Executive Director Ronel Buenaventura na bahagi ng imbestigasyon sa umano’y hindi maipaliwanag na yaman ng Bise Presidente ang naturang mga transaksyon. Ayon sa kanya, ₱3.7 bilyon ang nakapangalan kay VP Duterte, habang ₱2.998 bilyon naman ang nakatala kay Carpio.
Isinumite ang ulat ng AMLC alinsunod sa subpoena ng komite na nagsasagawa ng imbestigasyon kaugnay ng impeachment complaint laban sa Bise Presidente. Ayon sa mga mambabatas, layunin ng pagdinig na alamin kung may posibleng anomalya sa mga transaksyon at kung tugma ito sa idineklara sa Statement of Assets, Liabilities, and Net Worth (SALN).
Ipinunto ni Batangas 2nd District Rep. Gerville Luistro, chair ng komite, ang kumpirmasyon ng AMLC sa mga datos, na sinagot naman ni Buenaventura ng “Yes, Madam Chair.” Samantala, sinabi ni Rep. Joel Chua na ang naturang halaga ay “wala sa SALN” ni Duterte mula 2019 hanggang 2024.
Sa ilalim ng Anti-Money Laundering Act, ang covered transaction ay anumang cash o katumbas na transaksyon na lampas ₱500,000 sa loob ng isang araw ng bangko. Itinuturing namang suspicious transaction ang mga kahina-hinalang galaw ng pera na maaaring walang malinaw na legal na basehan, hindi tugma sa financial profile ng kliyente, o posibleng may kaugnayan sa ilegal na aktibidad.
Patuloy na iniimbestigahan ng Kamara ang isyu habang hinihintay ang karagdagang dokumento at paliwanag mula sa mga kinauukulan.
