Nakipag-ulay si Presidente Ferdinand “Bongbong” Marcos Jr. sa Singaporean Prime Minister Lawrence Wong ngunyan na Miyerkules tanganing pag-olayan an mga paagi tanganing orog pang mapakusog an relasyon kan Pilipinas asin Singapore, sabi pa kan Malacañang.
Durante kan saindang pagtiripon sa Istana, na nagseserbing opisina kan presidente asin prime minister kan Singapore, pinatunayan giraray kan duwang lider an haloy nang makusog na relasyon sa pag-ultanan kan saindang mga nasyon.
Susog sa Presidential Communications Office (PCO), pinag-olayan ni Marcos asin Wong an pagpahiwas kan komersyo, pag-aprobetsar kan mga oportunidad sa larangan nin artificial intelligence (AI), pag-engganyar nin mas dakol na pamumuhunan, asin pagpakusog kan kooperasyon sa salud asin sosyal na pag-uswag. Nagkaoroyon man an duwang lideres na magpursige nin mga bagong bilateral agreements na piglalaoman na mas makakatabang pa sa duwang nasyon.
Tinawan man nin duon kan PCO na pinakusog giraray kan Pilipinas asin Singapore an saindang mutual commitment sa pagmantenir kan sarong matoninong, estable, asin mauswag na rehiyon kan ASEAN, tanganing makagibo nin mas dakol na oportunidad para sa saindang mga tawo.
Si Presidente Marcos yaon sa Singapore para sa sarong working visit poon Hulyo 14 sagkod 16. Nakatalaan man siyang makipag-olay sa mga negosyante asin mga investors sa Milken Institute Private Roundtable Discussion. Mientrastanto, piglalaoman na maghatod nin mensahe si First Lady Liza Araneta-Marcos sa Global Economic Cooperation East Summit.
