Pigbaha an 17 barangay sa banwaan nin Libmanan huli sa Shearline kun saen an Municipal Disaster Risk Reduction Management Office an padagos man sa pagpagirumdom sa publiko na magin preparado.
Sa entrevista kan Bombo Radyo Naga ki Jemuel Guerero, LDRRMO Officer II kan LGU Libmanan, sinaysay kaini na kan nakalihis na aldaw an sainda man na pigmonitor an epekto kan shear line, kun saen an gobernador kan Camarines Sur soboot an nagpaluwas na man nin preparedness activities manungod man digde.
Katakod kaini, an LDRRMO Libmanan an nagkaigwa na nin pag-monitor sa mga barangay sa epekto kan shearline sa lugar. Dugang pa ni Guerero, 17 barangay an pigbaha, kun saen nakakurit na soboot nin 120 individuals na nag-ebakwar asin 37 pamilya.
Mientrastanto, nagsubside na soboot an tubig-baha sa lugar kasubanggi, Enero 12 nin huli ta nag-untok an an uran sa nasambitan ng banwaan kaya dae na naglangkaw pa an lebel kan tubig.
An 17 man na barangay sa saindang banwaan an pigkokonsederar na nasa low lying areas kun kaya padagos an saindang pagbabantay.
Sa ngunyan, an mga nasambitan man na mga evacuees an nagbweltada na soboot sa saindang mga harong huli ta naghupa na an tubig-baha sa lugar.
Pangapudan man kan opisyal sa mga residentes asin mga opisyales kan mga barangay na padagos na mag-monitor sa kamugtakan kan panahon asin pirmeng magin preparado nin huli ta piglalaoman na maeeksperyensiyahan pa an pag-uuran sa mga masunod na bulan.
