Namataan an duwang barkong pandigma kan China mantang nagsasagibo nin joint patrol an Philippines asin Indian Navies sa West Philippine Sea, basado sa militar kan nakalihis na lunes.
Sigun ki Lt. Col. John Paul Salgado kan Armed Forces of the Philippines (AFP), namonitor kan barkong pandigma kan nasyon na BRP Miguel Malvar an duwang barko kan People’s Liberation Army-Navy (PLA-N), na sarong Jiangkai II Class frigate na igwang bow number 551 asin sarong Luyang Class destroyer na igwang bow number 161.
An Jiangkai frigate an naispatan sa rayong 10 nautical miles, mantang an Luyang destroyer man an 15 nautical miles an rayo gikan sa BRP Miguel Malvar.
Siring man, sigun ki Salgado, mayong nagin panghihimasok gikan sa mga barko kan China asin marhay na natapos an saindang aktibidad.
Sa ibong kaini, padagos na pigbabantayan an hiro kan mga barko kan PLA-N. Kan nakalihis na domingo, nag-iba sa BRP Miguel Malvar an mga barkong pandigma kan India kaibahan an mga guided missile destroyer ndian Navy Ship (INS) Delhi, anti-submarine warfare corvette INS Kiltan, asin fleet tanker INS Shakti.
An sanib-pwersang pagpapatroliya man kan Pilipinas asin India an isinagibo kasabay kan pagbisita ni Presidente Ferdinand Marcos Jr. sa India komo kasimbagan sa imbitasyon ni Prime Minister Narendra Modi.
