Aram baya nindo mga ka-bombo, sarong 25-anyos na lalaki na gikan sa Japan an na-diagnosed kan dropping head syndrome huli sa labing pagyuko kan payo mantang naggagamit nin cellphone.
An nasambitan ng bihirang kaso an na-published pirang taon na an nakakalihis sa medical journal.
Susog sa report, napag-araman na igwang sasapuon na konsekwensiya an sarong indibdwal sa labing pagyuko.
Katakod kaini, an pasyente napag-araman na naggugugol nin halawig na oras sa paggamit kan saiyang cellphone kun saen nagkaigwa ini nin dakulaon na bukol sa likod kan saiyang liog na nagin rason tanganing dae na kaini maiangat an saiyang payo sa paagi kan paggamit kan neck muscles.
Antes man na magpasiring sa mga eksperto, pigsaysay kan lalaki na nakakamate soboot ini nin seryosong kulong kan liog asin disipil sa paghalon nin pagkakan na rason man tanganing magbaba an saiyang gabat.
Makalihis sana an pirang aldaw an saiyang liog nanluya, mayo na sa orihinal na posisyon asin dae na kayang angaton an payo.
An Dropped head syndrome sarong bihirang medical condition na kadalasan pigkokonektar sa neuromuscular conditions, alagad ini man an pighihiling na kawsa kan deformities kan spine huli sa halawig na oras kan pagyuko.
Mientrastanto, kinaipuhan na magsairarom sa neck surgeries an lalaki na kun saen makalihis an haros anom na bulan nagibo na kaining maiangat an saiyang sadiring payo asin nasa tama nang posisyon.
Sa ngunyan, liwat na nagpagirumdom an mga doktor sa peligro na naidadara kan pang-aabuso sa lawas orog na sa mga kajovenan.
