Gadan an nasa 25 katao kabali na an labi sa 1,000 an irido makalihis na sumabog an Shahid Rajaee Port sa Iran kan nakalihis na aldaw nin Sabado, Abril 26.
Sigun sa mga opisyal, nagpuon an pagsabog gikan sa sarong kasulo sa imbakan nin mga kemikal asin man delikadong mga materyales.
Naireport pa na saro sa mga sumabog iyo an sodium perchlorate, –sarong sangkap sa paggibo nin solid fuel para sa mga missiles.
Padagos pa man an mahibog na aso sa lugar dawa na 20 oras makalihis an nagin pagsabog, paramientras na sinuspinder an laog sa mga eskwelahan asin mga opisina sa karani na lugar huli man sa matinding polusyon sa duros.
Namatian man an pagyugo-yugo nin hasta sa 50 kilometro an rayo.
Minetrastanto, nagpaabot naman nin pakikidumamay si Iranian President Masoud Pezeshkian sa mga binawian nin buhay asin man nagsugo nin masusing imbestigasyon.
Nagpahayag man nin suporta an mga manlaen laen na mga nasyon siring na sana kan United Arabe Emirates (UAE), Saudi Arabia, Pakistan, India, Turkey, asin magin an United Nations.
Nagpadara man nin tabang si Russian President Vladimir Putin.
Pigkokonsiderar pa nin aksidente an nagyaring insidente, nangyari kasabay man kan pag uulay kan Iran asin Estados Unidos sa Oman katakod kan programang nuclear kan Tehran.
Napag araman kan 2020 tinarget kan cyberattack gikan sa Israel an parehong pantalan. Isinagibo man an tulong aldaw na National Mourning sa Hormozgan Province.
