Pig-report kan Philippine National Police (PNP) na nakapagrehistro sinda nin 28 kaso nin aksidente, kabali na an pagkalamos, kasulo, asin aksidente sa tinampo, magpuon kan orserbasyon nin Semana Santa.
Sigun sa PNP, 16 sa mga insidente an mga kaso nin pagkalamos sa manlae-laeng rehiyon, mantang igwa nin duwang aksidente sa tinampo sa Metro Manila asin Cagayan Valley. Igwa nin tulong insidente kan kasulo sa Metro Manila, Eastern Visayas, asin Zamboanga Peninsula, asin man sarong kaso nin arson sa Negros Island Region.
Bagaman igwa nin mga insidenteng nairehistro, sinabi kan PNP na nagtitinir na matuninong an obserbasyon kan Semana Santa 2025.
Mientrastanto, para man sa seguridad igwa nin 68,465 na mga pulis an ipinakuriyat sa bilog na nasyon, iba ini sa mga espesyal na deployment sa mga simbahan, mayor na mga tinampo, mga terminal, asin iba pang pampublikong lugar.
Inabisuhan man ni PNP Chief Police General Rommel Francisco Marbil an publiko na magin maingat, magsunod sa mga panundunan sa kasalbaduhan, asin tulos na ipaaram an ano man na insidente sa pinakaharani na estasyon kan pulisya sa mga lugar.
