NAGA CITY – Ibinuyagyag kan Bayan Bicol na antes pa man an nangyaring panggagadan sa tolong human rights workers sa Bicol, may mga nareresibe na an mga ining huma sa buhay.
Ini an kinumpirmar ni Vince Casilihan, tagapagtaram kan Bayan Bicol sa nagin entrevista kan Bombo Radyo Naga.
Sigon ki Casilihan, huli sa pagmamawot na makatabang sa namamawaan kan mga biktima kung kaya nabugtak sa peligro an mga buhay kan mga kaini.
Sa ibong kaini nanindugan an mga progresibong grupo sa rehiyon na an mismong gobyerno asin state forces an nasa likod kan magkasunod na krimen.
Mientrastanto sa suway na entrevista ki Nelsy Rodriguez kan Bagong Alyansang Makabayan, nangapudan ini sa kapulisan asin tropa kan gobyerno na untukan na an soboot pagdamay sa mga inosenteng sibilyan.
Marurumduman na kan nakaaging semana sana kan bawian nin buhay sa pangbabadil an mga human rights workers na sinda Ryan Hubilla asin Nelly Bagasala mantang sinundan man ini kan pananambang sa dating regional coordinator kan Bayan Muna Bicol na si Neptali Morada sa syudad nin Naga kasuudma.
Katakod kaini, nanindugan an mga progresibong grupo na dae sinda mapaapekto sa anumang pananakot na nasa likod kan nasambitan ng mga insidente.
