NAGA CITY- Kritikal pa nanggad suboot an kamugtakan kan limang persona kabale na an tolong pulis asin duwang sibilyan makalihis an nangyaring shootout sa Laguna subagong aga.
Sa ekslusibong entrevista kan Bombo Radyo Naga ki PC/Insp. Marcelino Platino, Chief PIO kan Quezon Police Provincial Office, sinaysay kaini na pigbubulong pa nanggad sa ospital an tolong dae pa pinapangaranang mga pulis, an biktima na si Ronaldo Arguelles asin sarong sibilyan makalihis na magsapo nin lugad sa saindang lawas sa nangyaring shoot out sa pag-ultanan kan mga kabuhan kan PNP asin mga armadong mga kalalakihan na nangyari sa San Pablo City, Laguna, bandang alas-6 nin pagkaaga.
Enot digdi, pig-kidnap suboot kan walong armadong mga lalaki si Arguelles sa harong kaini sa Candelaria, Quezon subanggi asin naghagad pa an mga ini nin ransom sa pamilya kan biktima na nagkakantidad nin P700,000.
Tulos man na nagkondusir nin operasyon an pinagsarong pwersa kan PNP Candelaria, PNP San Pablo City asin Anti-Kidnapping Group (AKG) kan Camp Crame na nagresulta sa riribayan nin putok sa pag-ultanan kan magkaibong na lado.
Binawian nin buhay sa nasambitang insidente si PO2 Zarah Andal asin an limang dae pa nabibistong mga suspetsado na nakasulot suboot nin police uniform kan nangyari an insidente.
Sa ngonian, nagpapadagos pa an operasyon kan PNP para maaraman kun apwera sa kidnapping, ano pa an posibleng motibo sa pag-kidnap sa nasambitang biktima.
