Salbadong nakapuli an 74 iba pang mga Overseas Filipino Workers (OFWs) gikan Lebanon na boluntaryong nagsairarom sa repatriation program kan gobyerno.
Kun saen, sinabat an mga OFW kan mga personahes kan Department of Migrant Workers (DMW) kaiba an iba pang mga ahensya kan Department of Social Welfare and Development (DSWD), Technical Education and Skills Development Authority (TESDA) asin Department of Health (DOH) tanganing mag asiste kan mga agarang tabang katakod sa direktiba ni Presidente Ferdinand Marcos Jr.
Sa tala kan DMW an huring batch kan mga Filipino repatriates an nakapagtala nin kabilogang numero na 1,564 asin 65 na dependents na salbadong nakabwelta sa nasyon komo parte kan dagos dagos na tabang kan gobyerno na apektado kan Israel-Hamas conflict puon pa kan Oktubre 2023.
Gabos nin OFW an makakaresiber nin tulos na tabang pinansyal, medikal, asin airport assistance. Apwera digdi, matao man nin suporta an National Reintegration Center for OFWs (NRCO) kan DMW para sa mga programang pang-upskilling asin sustainable reintegration, kabali an tabang pangkabuhayan asin training skills para sa mga apektadong OFW.
Tinawan-duon kan ahensya na an mga paglalapigot na ini an tanganing matabangan sinda na magtrayumpo para sa saindang mga pamilya gikan sa pagbubuklod sa kani-kanilang mga kuminidad.
