NAGA CITY- Nagin matrayumpo an pigkundusir na Palarong Panglungsod sa siyudad nin Naga.
Sa entrevista kan Bombo Radyo Naga ki Dr. Susan S. Collano, Schools Division Superintendent kan DedEd Naga, sinaysay kaini na natapos na kan nakalihis na Sabado, Pebrero 8, 2025 an awarding ceremony kan nasambitan ng aktibidad kun saen tinawan nin pagbisto an mga atleta na nagpahiling kan saindang tibay sa saindang kanya-kanya man na ladangan kan kawarat.
Marurumduman, kan nakalihis na Enero 31, 2025 opisyal na piglunsar kan DepEd Naga an taunang Palarong Panlungsod.
Digde, nagtiripon an mga student athletes kan manlaen-laen na school districts sa Naga, sa parehas na elementary asin high school categories.
Nagralaban an mga clusters na ini sa nagkapirirang mga sports puon kan nakalihis na Pebrero 1 hasta 2, asin nagpadagos sa Pebrero 8.
Sigun ki Collano an nanggana sa kompetisyon an nag-qualify asin iyo man an marepresentar sa Naga sa maabot na Palarong Bikol ngunyan na taon.
Mientrastanto, pigsaysay man kan opisyal na igwang nakahampang na problema an saindang lado sa pagkundusir nin aktibidad orog na ta dakula soboot an sakop kaini alagad kaipuhan na atubangon tanganing tolos na masimbagan.
Apwera digde, pigheras man kan opisyal na maski kulang sa budget nagibuhan man soboot nin paagi nin huli ta kaipuhan na dae masayang.
Sa ngunyan, pinasalamatan na sana ni Collano an gabos na nagtarabangan tanganing magin matrayumpo an nasmabitan ng aktibidad siringman pig-enkaminar kaini an mga atleta na pdagos na magin disiplinado tanganing magin marhay an saindang futuro.
