Naghihiro na an Office of the Civil Defense (OCD) tanganing maaraman an mga programang apektado sa pagpundo kan foreign aid kan Amerika.
Sa sarong memorandum order na pig-isyu ni OCD administrator USec. Ariel Nepomuceno, pigsugo sinda Assistant Secretary Bernardo Rafaelito Alejandro IV, OCD deputy director for administration, asin deputy administrator for operations Assistant Secretary Cesar Idio taganing aramon asin siyasaton an mga proyektong posibleng apektado kan direktiba ni US President Donald Trump.
Pighayag man kan opisyal na piggagalang kan OCD an nagin pronouncements kan presenteng administrasyon kan Amerika.
Pigrekomendar man ni Nepomuceno an nabanggit na mga opisyal kan mga lakdang para sa padagos na pagpapautob kan mg proyekto asin masierto an napapanahon asin episyenteng pagpapauton kan lambang inisyatibo.
Kun marurumduman, dakula an naitabang kan Amerika sa panahon kan mga kalamidad na nagtama sa Pilipinas.
Kaibahan na digde kan nakalihis na manlamasa an bagyong Kristine kan nakalihis na Oktubre kan nakalihis na taon kun saen nagtao an gobyerno kan US nin P84 million tanganing suportaran an piggibong mga relief efforts kan PH asin kan US Agency for International Development (USAID)-Philippines tanganing matabangan na makabangon an matinding naapektarang komunidad sa Bicol Region asin Batangas.
Marurumduman na pigsugo ni Trump sa bisa kan executive order an paramientras na suspensiyon kan haros gabos kan US foreign aid sa laog kan 90 aldaw, epektibo kan nakalihis Enero 20 mantang nakabinbin pa an pag-aadal sa mga programang pigsusuportaran kan US kun nakalinyada an mga ini sa policy goals ni Trump.
