Dapat na soboot ikonsiderar kan administrasyon ni Presidente Ferdinand Marcos Jr. na bumalik na sa International Criminal Court asin puonan an pag-iimbestigar sa iba pang imbwelto sa drug war.
Sigun sa human rights watchdog, an pagbusisi sa isyu kan extrajudicial killings an dae maikokonsiderar na political tool laban ki dating Presidente Rodrigo Duterte.
Sigun ki Human Rights Watch senior researcher Carlos Conde an dae pagtutok sa mga kaso asin pagbalik sa ICC an orog sanang magdara nin anggot kan mga tagasuporta ni Duterte nin huli ta maluwas sana na ginamit sana ni Marcos an isyu para sa pamumulitika.
Marurumduman na pirang beses sinabi ni Marcos na dae pigbibisto kan Pilipinas an hurisdiksyon kan ICC alagad sinabi man na dae kainj masasayumahan an hagad na tabang gikan sa International Police Organization o Interpol, tangani isirbi an ICC warrant.
Sigun pa ki Marcos, an nangyari kan nakaliyna semana, an piglalaoman na kan international community na nagkakanigo sana na gibuhon.
Dugang pa ni Conde, apwera sa ibalik an Pilipinas sa ICC, kaipuhan ni Presidente Marcos na mag-imbestigar sa mga pulis asin mga nasa poder na yaon sa likod kan mga paggadan kan nakalihis na panahon ni Duterte, bako sana kaya soboot si Duterte an sulamenteng suspek sa war on drugs kundi magin an pwersa kan kapulisan sa panahon kan administrasyong Duterte asin si re-electionist Bato Dela Rosa, na chief implementor kan war on drugs.
