NAGA CITY- Pigsierto kan Naga City Police Office na sinda an mabantay sa mga election paraphernalia na gagamiton sa 2025 midterm elections.
Sigun sa pamayuhan kan Naga City Police Office, igwang 150 na personahe sindang itatalaga sa Provincial Office o sa mga warehouses na makukua an mga gagamiton sa eleksyon siring lan Automated Counting Machine, ballot boxes asin iba pa.
Obheto kan nasambitan ng lakdang an tanganing magtinir na well-maintained an mga ini asin preparadong gamiton sa aldaw kan eleksyon.
Marurumduman, an gagamiton na ACMs sa presente an upgraded versions kun ikukumparar sa mga piggagamit dati, na kun saen igwang kapasidad na nagtutugot sa mga botante na mahiling an scanned image kan saindang ballots tanganing ma-verify na tama an saindang mga ibinoto antes an pinal na submission.
Katakod kaini, sa bilog na Bicol Region igwang 6,000 ACMs an ide-deployed kun kaya importante na mabantayan ini tanganing malikayan an darayaan o anupaman na problema.
Mientrastanto, pigsierto man kan hepatura na yaon an saindang police visibility asin padagos an pagkundusir nin Comelec Checkpoint tanganing magin matuninong an midterm election sa bulan kan Mayo.
